من يحدد خصائص هويتنا!!…

خلال اليومين الماضيين، دفعني تنويه يزن حول تدوينتي السابقة، لأن أختبر أصدقائي رغبة مني لاكتشاف ان كنت الوحيد أم أنهم معي في نفس المشكلة.

سألت ستة أصدقاء جامعيين، اثنان منهم ترددوا بالاجابة ولم يكونوا على يقين [هؤلاء استبعدتهم من تدوينتي هذه]، لكن الباقي كان على يقين شديد [جميعهم من دين واحد]، سألتهم بصيغة فردية بما معناه:

– أنا: يا زلمة سمعت؟ قال بدهن يشيلو بند الدين عن الهوية؟
– هو: شلون يعني؟.

– يعني خلص بس اسمك واسم عيلتك ورقمك الوطني، مافي داعي يعرفو شو دينك.
– ما بيصير!! شو هل الحكي!! كيف الواحد بدو يعرف دين التاني!!.

– قولتك رح يفشل هل المشروع مهيك؟
– ما بعتقد يساووها.

الصدمة كانت لما طالعوا الهوية وبلشوا يبحبشوا عن بند الدين وما لاقوه!!.

أحدهم قال لي انو هذا التغيير اجا بالهوية الجديدة، وما كان يصدق إلا لبين ما فرجيته صورة هويتي القديمة محتفظ فيها بالصدفة.

هلأ السؤال من وين اجا الوهم بأنه بند الدين مسجّل ع الهوية؟ هل هو من المجتمع؟ بالنسبة لي كنت شبه متأكد انو الدين مسجّل ع الهوية، لدرجة متذكر كيف كان مكتوب!!، بحبشت بالوراق القديمة، واكتشفت انو بطاقة البكالوريا يلي مسجّل فيها الدين كرمال تقديم امتحان الديانة كانت السبب في تشكيل انطباع في ذهني أنّ الدين مكتوب.

لكن هذا لا ينفي دور المجتمع الكبير في تشكيل خصائص الهوية الخاصة بكل انسان ومنهم أنا.

شو؟! شايف بلشتو تطالعو هوياتكن :) .

Advertisements

26 thoughts on “من يحدد خصائص هويتنا!!…

  1. ههه .. بكرة بدي اعملها مع الشباب .. :P ..
    بس يمكن القصة أنو بجواز السفر مكتوبة فانرسم ببالي أنو دائماً بالوراق الرسمية بيكتبو الديانة … ما بعرف بس كمان أنا كنت متصور أنها متكوبة!!

    1. لأ هو غير مكتوب ع جواز السفر، بعد ما تأكدت الدين مكتوب متل ما قال غافروش ع كل الوثائق يلي بتتعلق بقانون الأحوال الشخصية ودفتر العسكرية.

  2. على فكرة … في الأوراق الرسمية ودائرة النفوس لم يتم تغييب دائرة الدين في التعريف عن الشخص

    لذلك لا يوجد بالإحصائيات الرسمية أي وجود لللادينيين أو الملحدين أو اللاأدريين في سوريا ، فالأوراق الرسمية لا تعترف بأي شخص لا يملئ خانة العقيدة الدينية ، فالدعابة في الأعلى لا تخلو من الصحة .

    1. بكل الأحوال أنا مع عدم وضع بند الدين ع الهوية الشخصية، أمّا الوثائق الرسمية خصوصاً موضوع الأحوال الشخصية بعتقد شغلة صعبة كتير كتير، ولو كنت مع حق كل انسان بتقرير انتمائه الديني.

      يعني مثلاً اذا واحد مسجل انو مسلم وزوجته ملحدة لكن أهلها مسلمين؟ هل ترثه؟ هل ينطبق عليها قانون مدني شو عن أولادها يلي اختارو يكونو مسلمين؟ وكيف رح يتسجل الواحد ملحد اذا من لما عم يولد عم يتسجل الدين.

      شغلة كتير معقدة وبتوجع الراس، وبرأي يلي صاير هو أحسن صيغة بترضي الجميع، هويتنا العامة غير مسجل عليها الدين ولك حرية الاعتقاد، لكن ما يتعلق بقانون الأحوال الشخصية ضروري يكون في دين.

  3. يا زلمة ما بد يكتبو الدين عالهوية ما الأسامي بتفضح صحابا ولو.
    نحنا بوقت فقدنا في كل وية وانتماء حتى هوياتنا الدينية هي مجرد تعصب لنحس اننا منتمين لشي مو أكتر من هيك.

  4. بالهوية ما كان موجود, و لا بجواز السفر

    موجود بالبطاقات الامتحانية, بدفتر العسكرية, و بأغلب (مشان ما أقول كل) أوراق الأحوال الشخصية

    1. شكراً الك على لفت الانتباه حول الموضوع، بالنسبة لي، هويتي نابعة من قناعتي الشخصية فقط وفقط، وهي الأخيرة في حالة صراع مع قيم العالم المحكوم بالعولمة.

  5. أخي علوش..
    المشكلة ليست على الهويات وفي الورق ..المشكلة في العقول.. لو اتصلحت العقول والمفاهيم.. خليهم يكتبوه على جبينهم كمان..مافرقت..
    القصة انو قبل 1963م ماكان أحد يحس في فرق بين سوري وتاني لا بين الطوائف ولا بين الأديان..
    اسأل أبوك وجدك واسأل الكبار.. جارو كان مسيحي.. وكان يشتري الذهب من عند يهودي.. وما كان في تفرقة أبداً.. بل رئيس الجمهورية فارس الخوري كان مسيحي..
    وكان جميع أبناء الطوائف رفقة لبعض بحميمية زائد.. كما كان بين السباعي والفاضل..
    مين زرع هالشغلة؟ ها قصة ثانية..يمكن مدونتك مش مناسبة لإستعراضها..
    سلام

    1. “المشكلة ليست على الهويات وفي الورق ..المشكلة في العقول..”

      انت عم تتخيل معي تأثير العولمة على هل العقول!! يا ترى شو نوع الهوية الناتجة؟ عم تتخيل معي عقبة!! عم تتخيل معي المسخ يلي رح يطلع من هيك عقول أثناء احتكاكها بالعولمة!.

      بعين الله، تحياتي.

  6. عفواً عقبة بس فارس الخوري بعمرو ما كان رئيس جمهورية أصلاً في فقرة بالدستور انو لازم يكون الرئيس مسلم سني وألغيت سني بعدين. فارس الخوري كان رئيس مجلس النواب لفترة طويلة وصار مرة واحدة رئيس مجلس الوزراء.

  7. الحل واحد من اتنين:
    – دين واحد موحد اجباري ممنوع الاعتقاد بغيره تحت طائلة النفي. والقوانين تستمد منه… مثل السعودية.
    – الدين شخصي مثل نوع تسريحة الشعر. لا يسجل في أي مكان. والقوانين كافة مدنية وموحدة للجميع. كل “فرد” حر بما يعتقده سواء دين سماوي أو دين أرضي أو بحري أو لادين… مثل أمريكا.

    كل ما بينهما هو خطأ لا ينتج عنه إلا خطأ وضبابية ووجع رأس ويوصل دائما إلى حرب طائفية.

    أنا طبعا مع الحل الثاني.

    1. طبعاً أنا مع الحل الثاني، لكن الأمور ليست بهذه السهولة، فمن حق كل طائفة أن تطبق قوانين الأحوال الشخصية الخاصة بها في أمور الزواج والطلاق على أدنى حد.

  8. عفوا منك علوش لكن السؤال الك انت بيهمك يكون الدين مكتوب عالهوية
    و السؤال التاني ايمتا بدنا نخلص من هالقصة انا مع الحل التاني الي اقترحو اللي مو حابب يعلن عن اسمو
    المهم نمشي على مبدا الدين المعاملة و ياريت نلتزم في
    و نكون انسانيين مع بعضنا حد الموت

    شكرا لموضوعك

    1. أبداً، على العكس ما بيهمني أبداً، يلي بيهمني هو المعاملة قبل كلشي متل ما ذكرتي حضرتك، وأهلا وسهلا فيكي.

  9. انا بؤمن بمقولة الدين للفرد والوطن للجميع
    شو بدك بدين التاني المهم الأخلاق وهيك رح نضل شعب واحد ووطن واحد والناس كلها اخوية
    الغريب يا علوش انو انا كمان متاكدة انو الدين بينكتب ع الهوية ومتاكدة انو بينكتب مسيحي او مسلم
    بس ما وجدت شي ع الهوية

    1. هذا هو قصدي، انو كيف تهيأ النا انو الدين مكتوب، هذا اسمو تأثير المجتمع، هيك برأي، لأنو فعلاً كان بذهني انو مطبوع ومتأكد 100%، مو لأني مع أو ضد، انما مجرد انطباع ذهني تشكل نتيجة البيئة والمجتمع، تحياتي الك.

    1. “ماسكينه من دنبه”، هذا هو الوصف الصحيح لحال أغلب الناس، بتلاقي الواحد شيخ العشرة، ونازل تحريم وتحليل وتنظير وهو نفسه ماله علاقة بالقصص كلها، طبعاً مو قدام الناس، بينه وبين حاله.

  10. مثل ما قال رجل من روق، نحنا متعصبين على ولا شي. يعني الشب اللي بتلاقيه عم يشرب ويعرّس، بعد شوي بينزل على مظاهرة منشان يساند رئيس الحكومة السنّي. وبتلاقيه متعصب كتير ومستعد للتكسير والضرب (بل حتى القتل) … و قس على ذلك.

    عن أي دين عم نحكي؟

    أنا مع الخيار التاني، كون إنو وجود الدين على الهوية بيعني إنو الأشخاص اختاروا دينهم بنفسم. في ناس ما بتآمن بإله، كيف حاطين على هويته مسلم أو مسيحي؟!

    الدين ما بيمشي بالوراثة.

    1. هذا بالضبط الشيء المرعب يلي بخوفني، الله يبعد الطائفية عنا، هي نار بتحرق الأخضر واليابس، وأتمنى من كل طائفي يروح يحرق حالو ويخلص البشرية من أمثاله.

  11. اول ما قريت الحوار لسه ما عم كمل قلت لحالي ولو شو القصة ما الدين ما مكتوب ع الهوية اايه بعدين لما كملت قراءة تبسمت للفكرة ..

    برايي ما بيأثر وجودها من عدمه لانو بالنسبة الي حيالله حدا رح اتعرف عليه ما رح قوله طالع هويتك لاعرف شو دينك لانو اصلا ما كتير بهمني دينه

    وفي المقلب التاني اذا حدا من المجتمع بيهمه يعرف و يكتشف ما بدها القصه هوية بدها حوار كالتالي
    – من بيت مين انت
    – بيت فلان
    – بيت فلان اللي من المنطقة الفلانية و المنطقة العلانية ؟
    – المنطقة كذا
    و بتشتغل الذاكرة والاخبار و تذكر فلان من نفس العائلة ومين بيقربك ومين ما بيقربك و بيعرف الاخ شو دينه..

    1. “وفي المقلب التاني اذا حدا من المجتمع بيهمه يعرف و يكتشف ما بدها القصه هوية بدها حوار كالتالي
      – من بيت مين انت
      – بيت فلان
      – بيت فلان اللي من المنطقة الفلانية و المنطقة العلانية ؟
      – المنطقة كذا”

      مكشلتنا انو من كل عقلنا منرد عليه لهل الزلمة يلي ما صرلنا شي متعرفين عليه وهو فتح تحقيق معنا!!، كتير بكره يلي بيسألوني هيك اسئلة ومن جديد صرت أرد على أي سؤال مو عاجبني برد: “وأنت حضرتك شو بيهمك من هيك سؤال؟”.

      تحياتي إلك وسعيد بوجودك.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s