كنتاكي في حلب!!.

كنتاكي في حلب، حالياً في حيّ العزيزية، زحام شديد والناس واقفة على الدور!!! [لأنو طعم الفروجة غير!]، ايه فعلاً يلي بيعيش بيشوف.

كنتاكي في �لب

كنتاكي في حلب

لأول مرة نشهد اعلانات عن وجبات سريعة، تكتسح شوارع حلب! [لأنو ناقصنا].

اعلانات دجاج كنتاكي في كلّ مكان

اعلانات دجاج كنتاكي في كلّ مكان

لطالما افتخر الأمريكان بأنهم لم يعتدوا يوماً على بلد يحتوي سلسة مطاعم أمريكية، كون ذلك غير منطقي، فكيف تعتدي على شعب يأكل مما تأكل ويشرب مما تشرب!!!، باعتقادي أن هذه النظرية سقطت.

عن نفسي؟، لا شيء يعدل صندويشة الشاورما الحلبية بالجبنة مع لبن العيران البارد المنعش.

Advertisements

24 thoughts on “كنتاكي في حلب!!.

  1. شقد عينك ضيقة؟
    خلي الشعب يترفه يا رجل , يعني وقفت عالكنتاكي ؟

    شبنا علوش؟

    بالله في أطيب من الشرحات والجوانح عند صديقنا اللذيذ؟

  2. وجهة نظر أخرى:
    هذا ما يسمى بعصر العولمة… و عليك ان تفتح ذراعيك و تستقبل كل ما يأتي من العوالم الأخرى والتي قد تكون “أخرّى” .. تبادل ثئافات بمعنى آخر
    يعني ألا يقومون بفتح ذراعيهم و يستقبلون كل الثقافات ، ألا يوجد محلات فلافل و تسئية و شاورما في أمريكا؟

    مودتي

    ملاحظة : أن وجهة النظر الواردة في التعليق لا تعبر بالضرورة عن رأي مرسلها.

  3. إنسان ::. أمنية ::.
    ~~~~~~~~~~~
    لم يكن المقصود من طرحي أنني ضد هكذا مطاعم أو ضد العولمة، أنا نفسي انتظرت على الدور وتناولت سندويشة زنجر مع بيبسي كولا، وذلك لفضول في نفسي، لكن لم أجده مثير للأهمية، يعني طلع فروج في النهاية!!.

    بالنسبة لي كل شيء يدعو للتناقض، لأنني أمثل الجيل الذي يعيش مرحلة الدخول في اقتصاد السوق، كنا ندرس لسنين عن الاشتراكية وعن مساوىء العادات الاستهلاكية والتسويقية الرأسمالية واليوم أنا نفسي أصبحت مستهلك منغمس حتى الثمالة.

    لا أستطيع أن أصف شعوري، عندما تقضم كل قضمة وانت تفكر في الغارة الأخيرة، ثم تشرب قليلاً من الكوك لتدفع تلك اللقيمات إلى معدتك.

    وجود كنتاكي في حلب هو بحد ذاته شيء يدعو للدهشة، فالمنع طوال سنين كان لأسباب عديدة منها حظر الشركات الأمريكية على سوريا ومنها حظر سوريا على الشركات الأمريكية، واليوم نشاهد شيء كنا نعتقد أنه لن يحدث أبداً، هل اقتصاد السوق يتخطى السياسة!!.

    ثم يأتي دور مسألة تسويق الوجبات السريعة الخطيرة جداً جداً خصوصاً على المجتمع الحلبي يلي مش ناقصو.

    بدأت العديد من البلدان ومنها الولايات الأمريكية بالتفكير بمنع وحظر تسويق اعلانات الوجبات السريعة وتضعها بذلك جنباً إلى جنب مع منع اعلانات التبغ والكحول، الوجبات السريعة لا يجوز الترويج لها بهذه الطريقة، لماذا نستورد ثقافة شعب دون أن نستورد معها تجربته!!!، يعني كيف لنا أن نستورد ثقافة الوجبات السريعة الأمريكية دون أن نستورد القوانين التي تنظم تلك المطاعم ووسائلها التسويقية أو حتى الجدال الدائر حولها، لماذا نتجاهل كل ذلك ضاربين بعرض الحائط صحة المواطن السوري، التي مقارنة مع دول عربية أخرى تعتبر أفضل بكثير والفضل لعدم وجود هكذا مطاعم!.

    في الأسفل رابط يناقش جدوى القانون، بمعنى آخر هل يحق للحكومة منع اعلانات الوجبات السريعة أم لا.
    http://www.capoliticalnews.com/s/spip.php?article1046

    أؤيدك أمنية في كل ما ذكرت، وبالطبع أتمنى ان نصل إلى ذلك المستوى من تقبل الثقافات والانفتاح على الآخر، وعلى فكرة أمنية، أكلة الفلافل في أمريكا معروفة أنها أكلة اسرائيلية، يعني الأمريكيون يجدون ان صندويشة الفلافل هي من الثقافة الاسرائيلية!!، مثلها مثل الحمص، والخبز العربي في بعض البلدان هو خبز ايطالي، يعني طلعنا من المونة بلا حمص، حتى أكلنا سرقوه!.

    أنس، والله هديك القعدة بتسوى الكي اف سيه ويلي خلقه.

    أشكر مروركما.

  4. شو هالتطبيع الأمريكي السوري..
    مو على أساس….. وإلا بلاش نحكي
    طبعا احنا بعد مالعالم يكتشف الشغلة ويشبع منها ويموت الآلاف بسببها ويتبين ضررها ويبان سوئها وعوارها.. نبدأ في استخدامها
    معروفة هالكليشة بكل شي..
    ووين الشعارات القومية والإشتراكية والوحدوية والتعريب وأكل الهوا والسم الهاري ومابعرف شو..
    ووين الحصار الأمريكي والمنع الإقتصادي..
    بالله علوش..مين وكيل كنتاكي عندكو (اللي اشترى الفرانشيز).. أكيد اللي بالي.. اللص على حكى عليه مداد من يومين..
    نصيحة لاحبائي الحلبيين (دائما أتجادل مع إمي وين بدي أسكن لما أرجع سورية (عجل الله فرجي) الشام وإلا حلب.. ويدور نقاش طويل عريض وبالاخير أقرر..ست شهور هون وستة هنيك)
    خليكم على المحاشي والكبب والكباب ولا تنخدعوا بالفروج الزائف هذا اللي يسمم العقول والأبدان..
    (يكفي يا عقبة أيها المتطرف ..شو بدك تنشر حمى دينية جديدة :) )

  5. بصراحة … أكلت من كنتاكي اللي بالشام وما لاقيت هالشي المميز والخلطة السرية اللي عم يدعوها يعني والله والله بروستد السندباد او هاد اللي بالخالدية اطيب … لسا الاطيب هو شغل ام محمد الله يخليلنا ياها

    مالي ناوي جربوه … متوقعها نفس الطعمة اللي كانت بكنتاكي ابو رمانة …

  6. أمنيتي أن تردّ سوريا على هذا الغزو الثقافي المنكر بافتتاح سلسلة من مطاعم الشاورما في الولايات المتحدة، ولتبدأ من ممفيس مثلاً!

  7. لك شو بدك بعد المحاشي الحلبيه واللحمه بكرز والسماقيه والسقرجليه وعش البلبل واللحمه بشقف او كباب وجنبها البيواظ او العيران وتطبخهم خالي ام عبده وبعدك بتقول اكل سريع وعولمه
    لك كول فول وارجع للاصول هيدي حكمة خالي ام عبده

    بعدين بعد ما خلصوا هل بنايه بالعزيزيه بعدهم مغطينها بلوحه اعلانيه وبتقولوا ما عنا عراقه
    اخ على سندوبشة جبنه حلبيه مع الكوكتال من شارع بارون او مامونيه مع جينه مشلله لك صار معنا فقر دم مستعصي هون

    اخخخخخ يا علوش فتحت علينا المواجع وصحتين على الكنتاكي ودائما صور حلب اليوم عيشتني بحلب الصبح

  8. إي والله يا علوش .. عنجد ما في أطيب من سندويشة الشاورما عندكم .. مرة أكلتها بمحل بجانب باي باي قريب من دوار الموكامبو (يمكن) ما عاد اتذكر الأسماء ..
    بس عنجد شو بدك بالحكي .. اختراع حلبي يشهد له .. أطيب من السندويش عنا

    هلأ شوف ما بحب انظر للموضوع من ناحية الغزو الثقافي يلي بقودوا عمك كنتاكي .. لا خلي الموضوع إنو تبادل ثقافات وتنوع أطعمة مو أكثر من هيك .. صحيح هو مو أكل صحي كثير بس معلش عنجد طيب .. بدك أطيب من هذا الفروج المقرمش وهو سخن وقدامك الكولا .. أأأه شغلة ..

  9. علوش : بغض النظر أن كنا مع أو ضد العولمة ، فنحن مجرورون أليها . مع أني اعتقد أن ما يحدث في العالم هو “أمرّكة ” و ليس عولمة.
    ما ينتابك من مشاعر حين تتداول مع أي شيء أمريكي ، هو أمر مشترك. عني اتمنى أن أصل لمرحلة مقاطعة البضائع الأمريكية. هو شيء تستطيع فعله بسوريا بسهولة كبيرة . لكن خارج سوريا الموضوع متعب بعض الشي بما أن أغلب البضائع الاستهلاكية المنتشرة مذيّلة بصنع في أمريكا.
    ولا تخف على المواطن السوري، فهو يعرف جيدا أين يضع لسانه.. لا اتوقع له الاستمرار. أذكر أني عندما قمت بتذوق هذه الوجبات أول مرة ، كنت أعتقد أني سأكل شي خياليا كما يصوروه في الدعايات، وعند أول قضمة ، تبين لي أنه ضحك على اللحى. و أؤكد لك ، و سيلمسه من يغادر سوريا، أن الطبق السوري لا يعلى عليه… بشاهدة جميع الجنسيات العربية.

    غلطة انتشار المعلومات الخاطئة عن أي شي هي غلطتنا أولا و اخرا.

    نحن على فكرة ، نقوم بخطوات لندخل هذا الغزو ، لا اعلم عن أمريكا ، لكن في مطارات دول الخليج ، هناك زاوية صغيرة قرب زوايا الوجبات الأمريكية السريعة، جنب الى جنب، تقدم الحلو العربي الشرقي “سميراميس” ، و الشوكلا ” غراوي” . مع بطاقة صغير ة مكتوب عليها” صنع في سوريا”. أذكر أن في زيارة الرئيس السوري لأمريكا، قام باصطحاب أصحاب معمل غراوي معه، حيث خرجوا عليهم بالتلفاز، قائلين : امريكا، استعدي لتذوق شوكلا غراوي.

    مودتي

    مودتي

  10. اي سيدي صحة و هنا

    الحلو بالموضوع انه كل المواد المستخدمة هي من سوريا يعني مو مستورد

    بينما هون بالإردن اغلبه من بري البلد حتي المطبوعات

  11. ما أخبار الحظر الأمريكي على سوريا :)
    يحظرون الدواء و التجربة العلمية و يسمحون للأكلات السريعة بالتعامل مع “الأعداء”؟؟
    حقا يفعلون ما بوسعهم لإدرار النقود على اقتصادهم!

    ملاحظة: هل هذا الطعام يستحق الأكل فعلا؟ شخصيا لا أتناوله إلا مضطرا بسبب دعوة أحدهم..

  12. بغض النظر عن مصدر كل هذه العولمة … انا فكرت بشيء آخر ….. المشكلة هنا أنني أخدع من أول مهمة الشراء وحتى آخر لقمة من الوجبة الهزيلة التي لا تتناسب أبدا مع سعرها …. الماركة أمريكية والطباخ محلي (local) …. الأمر يتعلق بالموضة والمظاهر لا أكثر ….. هل نحن هكذا حقا …. لم يبقى غير أن نتجمع ونمسك بلافتات مكتوب عليها : تعالوا اضحكوا علينا واصطحبوا معكم أصدقائكم وبعض الشطائر الكنتاكية … سيكون مشهد مسلي حتما ….. بالنسبة لي لا تشبعني وتعبي معي كما يقولون سوى الفروجة الحلبية القلعجية الزفرة …..
    سلامي لك

  13. صراحة يعني ..بعيدا عن الماورائيات ..
    موضوعيا .. مو هالاكلة .. “يعني بالامارات محل ما انا عايشة من زماااااااان في كنتاكي وعنجد قبل كان اطيب بس هلق لا نوعية ولا كمية ” ..
    هلق الناس اول شي رح تصير تهجم عليها لعدة اسباب
    – شي جديد
    -اكلة ماركة
    – برستيج “تجغيل يعني ”

    ايه يعني ببساطة بكرة بيملوا لانو غالية وما هال “نوعية ولا هالكمية ” .. وما اطيب صحن فول عند ابوعبدو الفوال .. او سندويشة شاورما هالقد ادهاااااااااا ..

  14. ايه خلص بقى علوش شو فيها اذا الواحد حب يغير شكل ويفتح محل عليه القيمه
    بعدين انت ما بتعرف انو قسم كبير من الناس اللي بحلب بيلحقوا الاسماء بس مشان يقولوا انو اكلنا من فلان محل شربنا من عند فلان محل
    بقى خلصنا والله لو كان عندي امكانيه كنت انا اول الناس اللي بيفكروا بهيك مشروع
    بعدين تعى لهون
    ليش ما قلتللي انك رايح لهنيك مشان نروح سوا ونجرب هالاكل العظيم
    بنتواجه

  15. هههههه
    لن اقول لك ماذا حدث عندما فتح اول مره في مصر / المنيا …
    علي العموم الوجبات السريعه لهو هلاك سريع :)
    لذلك احاول ان ابتعد عنها قدر الامكان :)
    كل عام و انت بخير :)
    تحياتي لك

  16. Okbah ::.
    ~~~~~~~
    والله ما بعرف مين الوكيل، بس على حد علمي هو استثمار من قبل مجموعة الخرافي الكويتية.

    هو أكل حلب لا يعلى عليه، لكن اذا لم تتطور مطاعم الوجبات السريعة وترتقي لمستوى المنافسة ستتحول إلى فلكلور لا أكثر ولا أقل.

    حلب أم الشام؟ المي أم الهوا، الاثنين أحلى من بعض.


    ناسداك ::.
    ~~~~~~~
    يعني فروجة متبلة شو بدها تكون، بس كل الناس دخلت جربتو لأنو شغلة جديدة، متلي يعني على قد ما شفت دعاياتو قلت خليني شوف فروجة الكولونيل شو بتفرق عن فروجة صلاح الدين!، طلعو 2 نفس الشي، بس الأول بيخدمك بابتسامة وبخليك تحس انك زبون، والتاني الا شوي رح يبزء عليك ويمننك انك عم تشتري من عندو.


    أيمن ::.
    ~~~~~~
    والله يا أيمن لو توفرت الارادة لاكتسح الأكل السوري العالم، مافي مطبخ عالمي الا ومطبخنا جزء منو، بس بكل صراحة طول ما ثقافة الدكنجي معششة بأصحاب الوجبات السريعة المحلية ما رح نقدر حتى نوصل لأبعد من حدود المحافظة.


    genin2002 ::.
    ~~~~~~~~~
    ايه فتحتلي شهيتي يا زلمة، من دون شي هل العيد مالي مخلص.

    سررت بوجودك دائماً.


    مستر بلوند ::.
    ~~~~~~~~~
    اذا بدك الشاورما على الأصول روح على الجميلية من عند مشاوي حلبية، تعا المسا لأنو فوج الصبح ما بيفهموا بالأكل، فوج المسا هن المعلمية، طلوب شاورما جيج بالجبنية دبل، قلوا بدك كلشي دبل، اشتري قنينة لبن عيران باردة بوظ، وروح على الحديقة العامة وقعود على نهر قويق [بعد التجديد طبعاً]، وكول يا معلم.

    أكيد الفروج لذيذ ليش ايمتى الفروج كان ما طيب، انشاء الله يصير منافسة وتتحرك خدمات الوجبات السريعة شوي.


    أمنية ::.
    ~~~~~
    بالتأكيد أمنية الأكل السوري لا يمكن لأحد مقاومته مهما كانت ثقافته لأنه طعام عالمي بكل معنى الكلمى، ومن نجح في دخول المنافسة هم سورييون يمتلكون فكر وبعد نظر، لكن للأسف عندما ننظر للغالبية نجد أنهم ما يزالون يتعاملون بثقافة الدكنجي، يعني نجاحهم ليس بسبب ادارتهم أو تسويقهم، نجاحهم لأنهم يقومون بلف صندويشة الفلافل بشكل أسرع وهم أصلاً يروجون طعام متعارف عليه ومطلوب في أي مكان من سوريا.

    سأعود بحديث عن ثقافة الدكنجي لاحقاً.


    Qabbani ::.
    ~~~~~~~~
    ع قلبك، هذا شيء جميل، خصوصاً أنّ بيبسي هي مندرين بدون أي تغيير، يعني مجرد تغيير لليافطات، يبقى أن نتمنى أن ترتقي سلسلة وجباتنا المحلية إلى مستوى الخدمة والرقي لدى كولونيل كنتاكي.


    مدونة محمد ::.
    ~~~~~~~~~~
    الدجاج المقلي يا محمد لذيذ شو ما كان يكون، بالنسبة للحظر للأسف نعم كما ذكرت.


    عطاالله ::.
    ~~~~~~~
    نعم يا سيدي، ماركات ويافطات هذه هي السوق هذه الأيام، بنطلون جينز حقو فرنكين بيصير شغلة روعة لو كان من المحل الفلاني، فليش ما يطبقوا هل الشي على الفروج، بوكرة محلات القهوة المبعثرة هنا وهناك تتحد تحت اسم ستاربكس، انت صدق ودخول، فعلاً عم نضحك على حالنا، أكل سوري بغلاف أمريكي!!.


    manolia ::.
    ~~~~~~~
    تماماً مانوليا، شغلة جديدة، لكن خلينا نعترف شوي انو خدمتهن أحسن بكثير من خدمة غيرهن، على الأقل على مستوى مطاعم الوجبات السريعة.

    أنا متفاءل بانو هل الشي انشاء الله رح يخلق شوية تنافس وبركي منسمع بأسماء محلية قديمة صارت وتصورت.

    سررت بوجودك.


    Emad ::.
    ~~~~~~
    خلص لعيونك، المرة الأولى كانت تجربة، المرة التانية على حسابك أحلى فروجة من عندك عمك كنتاكي.


    Ehab A. Mohammed ::.
    ~~~~~~~~~~~~~~
    والله معك حق، هي هلاك كبير، الله يقدرنا على مقاومتها.

  17. عقبال ماكدونالدز!

    بقول المتل، قعود أعوج و إحكي جالس. تحياتي للمناضل الشعبي علوش :)

    و الله يا سيدي هيدي مشكلة موجودة عند الكل. متل ما قلت، ما في أحسن من صندويشة الشاورما. يلا بسيطة، عمرو الزعل!

  18. لك إيش إلكن بالحكي عن جد بعد الأكل السوري مافي
    أنا سورية مقيمة بالإمارات و هون في عن نمط كنتاكي ألف نوع و ألف شكل بس رغم هيك بضل الأكل السوري البتوتي غير يعني أكلة محشي أو كبة لك حتى المجدرة و الفاصولية بزيت و صحن التبولة و الفتوش بيساوي ألف وجبة من عند كنتاكي أو من عند الببيتزا هت
    فالله يديم النعم علينا و يديم همة النسوان بالبيت لحتى يضلون يطبخولكن أطيب الأكلات

    1. أمورة ::.
      ~~~~~~
      على سيرة الأكل السوري، أنا بعتبر أكلة الكبة النية اختراع نووي بحد ذاته، اختراع يوزاي الهبوط على القمر، أكلة في قمة البساطة وقمة اللذة، آسفي على العولمة إذا ما أكلت كبة نية،
      هلا فيكي.

  19. اشو اكل سوري م سوري هذا كلو اكل للبناني بس سورين اخذو من للبنان كبه وشورما وفول حتى حلويات كله من للبنان

  20. وسيم المنصور ::.
    ~~~~~~~~~~~
    لا تجور ع حالك، تقبر قلبي، ولك حبيبي الكون كله لبناني ونحن ندعم مطالبك، حياتي اتته.

  21. فارس العوض ::.
    ~~~~~~~~~~
    ويترفه شو أنا ماسكو يعني؟ انا حكيت يلي ببالي، ليكون ممنوع، خليه يترفه، روحنا الترفيه نحن.

التعليقات مغلقة.