غربان آخر الليل!!.

في الليل يفترض أن تنام كائنات الله، من البشر حتى الحمير، والحمدلله أننا نسكن في ضاحية بعيدة كلّ البعد عن صخب المدينة وأجواءها وهي ضاحية الحمدانية، ومن مميزات الحمدانية مساحاتها الخضراء الفاصلة بين أبنيتها التي صممت على النمط السوفييتي البسيط والمتواضع، جميل حتى الآن أليس كذلك.

ضاحية الحمدانية منظر من جهة الملعب العملاق

[ضاحية الحمدانية من الزاوية الشرقية للحيّ الأول، وهو المكان الذي أعيش فيه، الحمدانية لديها أربع أحياء، اضافة إلى فيلات الحمدانية، وضاحية الأسد، ويبلغ تعداد سكانها حتى 2004 نحو 350 ألف نسمة]

جميل حتى وصول مجموعة غربان [لاحظ أنني وضعت رابط ويكي الانكليزي الغير محجوب وليس العربي المحجوب!!!] قررت بناء عشّ لها في أشجار الحديقة المطلّة على منزلي، ومن سذاجتي، كنت سعيداً عند رؤيتها، ظننتها ضيف مهاجر هممت بتصويرها بالكاميرا، لم أكن أدري أن المنطقة أعجبتها وقررت المكوث.

خلال هذا الأسبوع شعرت بارهاق شديد، وتعب جسدي ناتج عن عدم استقرار الجوّ فلا هو بحرّ ولا هو ببرد، وساعة مطر وبرد، وساعة حرّ وشمس، هذا عدا دراستي لمادة المنشآت المالية التي هلكت عمري وانشوصت عيوني بالميزانيات وأرصدة المراجعة.

رغم ذلك يبقى شيء واحد يواسيني، وهو سريري، ملاذي الأخير، كهفي، ومع هذا الارهاق يفترض بي النوم بدون هزّ كما يقال، كالطفل الوديع، آه كم سيكون رائعاً لو تمكنت من الحصول على قيلولة كهذه، لكن لا، السيد غراب أبى أن ينام، السيد غراب يريد أن يسهر ويطمئن على أطفاله، السيد غراب لا يستطيع أن يخرس، سواء كان يطير في الهواء أو يطعم أولاده لا بد أن يسمعني صوته المبخوش، الغليظ القبيح النكر، يا الهي لما لم ينقرض هذا الحيوان، الفيلة رح تنقرض وحضرتك ما انقرضت.

أدرك أن جماعة رعاية الحيوان بدهن يزعلوا مني، ولك ازعلوووو، لط*ز*، أعصابي تلفت يا جماعة، كل ما بغمض عيني وبحس حالي غفلت، وإذ بـ “وااااااق وااااااق” وعقولة أمي، قال هذا مو غراب، هذا قاق، قلتلها قاق، غراب، على مين يصيدو ويريحني.

تحديث: بعد التمحيص بالصورة التي التقطتها له ولكن للأسف عبر الفيديو ومن خلال شبك النافذة الحديدي، لكن مع ذلك تمكنت من تحديد جنسه، الغراب أبو خوذة [الترجمة من عندي، والانكليزي اسمه Hooded Crow] ، على كل الصورة بالأسفل هي التي التقطتها له.

غراب أبو خوذة

لأ وأثناء النوم وبسبب التعب الشديد بتبلش الأحلام تدخل مع الواقع، صرت أحلم إنو اجت البلدية وقررت تصيدو، وإنو رجال البلدية إجو بالموتور، شنو سمعت صوت موتور، وأنا بنومي عم أترجى إنو بس يقتلو وأخلص ، وقسماً بالله كل ما بغفل شوي، فجأة بيقطعلي النومة صوت هل الحمار [يعني الغراب].

طبعاً ما قدرت أنام وفقست النومة كلها، وأثناء كتابتي هل الموضوع ما قطعني الغراب أبداً، كل شوي يسمعني ألحانو، وأنا جسمي بينئز متل كأنو حدا شكني بالكهربا كل ما بيصيح هل الدب [يعني الغراب]، لأ وأحد جيراننا الأطفال الحلوين، ملائكة الأرض عصافير الجنة، المفلوت بالبلكونة قرر يلعب مع الغراب لعبة الببغاء، كل ما صاح الغراب، بتلاقي الولد بيصيح بصوت أعلى منو، إيه لكان شلون، بدو يتسلى، الله يحفظو لأمو.

عيوني لم تعد قادرة على الابصار، أشعر بالدوار وأرغب بشدة بالنوم، لكن هذا الكائن، المخلوق، ما بدو ينام، يا ناس صرلي ثلاث أيّام على هل الحالة، مو معقول.

والمشكلة إنو الغراب متخبي منيح بالشجر، ما بتعرف وينو، حتى هيك أصيبو بشي حجرة تفجّلو راسو.

  • عماد ينطلق بمدونة جديدة على ووردبرس.كوم، ويختار لغته العربية لتكون لغة التواصل بينه وبين أهله في أرجاء المعمورة، ما رأيكم بزيارة وبعض من التشجيع لعماد.
  • المدونة على الأغلب ستدخل في سبات قد يطول حتى نهاية الفحص، على كلٍ تابعوني على روابط الخلاصات.
  • البارحة اتصلت معها، كنت سعيد جداً لسماع صوتها، مشتاق ومتشوق للقاءها ;) .
Advertisements

17 thoughts on “غربان آخر الليل!!.

  1. ههههههههه

    طول بالك .. أنو يعني شغلة .. جاية عبالي ابعت هالمقال لشي جمعية حماية حيوان ..
    بلكي بيعرفوا انك ناوي عليه … بيقوموا بيسحبوا ويحطوا بغير هالمطرح

    ياسيدي كان منزوع مراقي نزعة … بس عنجد ضحكتني

    مدامك نعست كتير المفروض هلأ بعد شوي .. طب وتنام وماعاد تحس على شي لا قاق ولا ديناصور :)

    موفق بامتحاناتك

  2. ههههههههههه
    مش عارف اضحك او احكيلك الله يكون بعونك .
    انا لو محلك بمسك خرطوم الماء كل ليلة وبرش على الشجرة ،،،وهيك رح يزهق ويروح انا متاكد.
    ان شاء الله موفق في دراستك علوش
    تحياتي

  3. بتعرف وين المشكله ؟ المشكله انو انا وقت كنت ادرس كنت كمان اسمع شكة الدبوس عالاررض مدري ليش الواحد بيضطرب بس يصير عندو امتحان وبيصير ما بيتمنى غير الجو المثالي المهم الله يوفق ويا سيدي بتمرق متل ما مرق الي أقوى منا وإنت قدها وبتفرحنا بالشهادة وانشالله العروس كمان ياسيدي

  4. كنا صغار نرميه بالحجر ويهرب

    مرة رفقاتي اخدو فرخ احد الغربان وصاروا يعذبوه وانا كنت اقلهم لأ ومايردوا علينا قام اجوا ابوه وامه صاروا يهجموا عليهم هههه

    تعيش وتاكل غيرها علي … يالله احسن ما تسمع صوت حفر الماكينات طول النهار وبياع الغاز

    بالمناسبة كيف المنشات ؟ والله انا درستها ع السريع ورح ركزها بالفحص لانو عندي قبلها 11 يوم

    شجعني كمان صاير عم دون على السبيس تبعي حسب الفضاوة بما انو حجبولنا مدونات مكتوب :(

    سلامات عزيزي

  5. ههههههههه

    والله يا علوش حالتي مو احسن من حالتك …
    القطة صرلا آعدة بأدني يومين وما كانت تحل من ادام بيتنا …
    والله ما اخدتلا شي :( :( :(

    الله يعينك يا رب .. وان شاء الله هيك بروح الغراب بدون تقويص :D

    بالتوفيق بامتحاناتك وان شاء الله منفرح بتخرجك : )

  6. خلص علوش طول بالك ما الك غير انو تاخد من عندي بارودة الصيد وتقوصه وتخلص من هالشغله
    بس اذا مسكوك الشرطه طبعا انا ما الي علاقه

    او عندك حل تاني وكتير حلو

    انو كل ماشفت هالغراب بدو ينام تطلع عليه وتصرخ مشان ما يقدر ينام وهيك بيكون نعسان كتيييير وقت ما بدك تنام انت

    وهكذا سيحل الامن والسلام على علوش وسينام هو والغراب بسلام وطمأنينه

  7. و الله ما بعرف ليش مدونتك بتكرهني يا علوش ، صارت أكتر من مرة آكلة تعليقاتي !

    يبدو هالمنطقة اللي ساكن فيا حلوة ، قوصو لهالغراب و ارتاح :) مع أنو بالصورة مبين حلو ما بيستاهل.

    خيو موفق بامتحاناتك كلها ، و بالحب
    مدونة عماد حلوة بتمنالو التوفيق …

  8. بقى لي أكتر من 3 أيام ما بنمش
    ما عندناش غربان الحمد لله
    بس عارف يا علوش
    ممكن تكون حالة نفسية عشان الامتحان
    شبب عدم نومي
    إن أي حركة في الشارع بحسها وبتصحينىىىى
    ودي كارثة!!!
    لأن لو حد ماشي في الشارع والله والله بحس صوت مشيته
    يعني تخيل أنام ازاي أنا بقى كده؟؟؟
    :(

    ربنا يعدي الشه رده على خير
    ونفرح بنجاح وتخرج المدونيين

    عندي فكرة ليك انت وفتوشة بما انكم خريجين معايا السنة دي
    ايه رأيك ندور على باقي الخريجين السنة دي ونعمل حفلة تخرج تدوينية في آواخر شهر يوليو؟ :D

  9. لا عليك يا صديقي فمن يدري ربما كانت للغراب أيضاً مشاكله وربما يحاول إثبات وجوده كما يفعل الكثير من حولنا الذين نجبر على تحملنا أصواتهم المنكرة وهم مختبؤن خلف شيء ما ولربما هو يعتبر أنت المعتدي وعموما غراب ينعق أفضل من جار يبعق*

    *يبعق : يصرخ بصوت أفظع من صوت الغراب

  10. جميعاً ::.
    ~~~~~~
    أشكر وجودكم وسعيد بقراءة اقتراحاتكم وتشجيعكم، ممتن حقاً، للأسف لا يمكنني تقويصه ولا حتى حرق الشجرة، ربما الأجدر أن أنتظر حتى يمّل من الاقامة ويهاجر مرة أخرى بعيداً عن منزلي.


    عوني ::.
    ~~~~~~
    نعم مسلسل الحجب مستمر وللأسف.


    سلام ::.
    ~~~~~~
    هناك مشاكل عديدة مع التعليقات، بعضها من السيرفر والبعض على ما يبدو من اتصالك. جاري حل ما يمكن.


    قطر الندى ::.
    ~~~~~~~~~
    فكرة حلوة، وانشاء الله بعد التخرج متناقش فيه.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s